كشف لاعب الزمالك السابق كواليس جلب أحمد سيد زيزو، لاعب الأهلي الحالي والأبيض السابق، عرضًا له، من أجل الرحيل عن صفوف القلعة البيضاء.
وقال كريم عبدالحق، لاعب الزمالك السابق في تصريحات تليفزيونية: «أنا كنت في ناشئين نادي الزمالك ومكانش معمول لي عقد، وكان أوسوريو مدرب الفريق وقتها والقيد واقف فجالي عرض من سيراميكا كليوباترا، وروحت لقيت بعدها عبدالواحد السيد، مدير الكرة، كلمني وأنا بتدرب في سيراميكا وقالي أنا قعدت مع أوسوريو والراجل عايزك».
وأضاف: «سبت سيراميكا رجعت الزمالك بيتي قعدت لآخر يوم في القيد والمسؤول الإداري قالي أنت اتقيدت، مضيت على بياض وكابتن عبدالواحد السيد قالي هعملك عقد بمليون جنيه».
وأكمل: «بجيب العقد من اتحاد الكرة لقيته عاملي العقد 500 ألف أول سنة والثانية 600 ألف والثالثة 700 ألف والرابعة 800 ألف، بعدها بفترة طلعي مبلغ 130 ألف جنيه».
وتابع: «زيزو كان بيحبني وعارف إني لاعب كويس قالي أنا خلصتلك في الداخلية إعارة فـ أنا فرحت قولت هروح ألعب بعدها في الداخلية كلمني مدير التعاقدات قالي خلي عبدالواحد السيد يرد، مكانش بيرد وروحت أنا قولتله طلعني إعارة، قالي لا أنا هطلع لاعب أجنبي قولتله أنا إيه ذنبي وفضل يتأخر والموضوع باظ».
وزاد: «بعد كدة عبدالواحد السيد قالي أنا اتبلغت في 8 لاعيبة هتمشي أنت منهم حاولت بعدها أجيب عرض، مكنش في وقت، وفي آخر يوم في القيد، عبدالواحد السيد قالي أنا بخلصك في الإسماعيلي قولتله يا كابتن قولي عشان أنا مستقبلي بيضيع، وفضلت لحد الساعة 11 بالليل فضلت قاعد لقيته بيقولي خلاص قولي وتعالى عشان أروح الترسانة».
