وجه الإعلامي إبراهيم فايق رسالة مؤثرة إلى محمود عبدالرازق شيكابالا قائد الفريق الأول لكرة القدم بنادي الزمالك بعد قراره اعتزاله كرة القدم نهائيا.
وكتب إبراهيم فايق عبر حسابه الرسمي على «فيس بوك»: «فيه لعيبه كتير ونجوم حبوا الكرة وتألقوا، وقليلين جدا عبر التاريخ، الكرة هي اللي حبتهم، الكرة هي اللي جريت علشان تبقى في رجلهم، معاهم يعني متعة، يعني أهات تهز الملعب، يعني مرحبا بكم في السيرك».
وتابع: «شيكابالا في كتاب الكرة المصرية واحد من أعظم وأمتع من قررت كرة القدم أن تحبهم وتمنحهم مفاتيحها بخضوع، فأصبح بأمر الكرة، الساحر الذي لا يشق له غبار».
وأضاف: «شيكابالا هيعلق حذاؤه وهيختتم مشواره الكروي برغبته كمان أعلن معي في حواره الوحيد هذا الموسم، وهي لقطة أتخيلها صعبة على الجميع، على شيكا نفسه اللي منح الجميع وجمهور الزمالك العظيم متعة حقيقية ولحظات سعادة لا تقدر بثمن ولا تنسى مهما مر الزمان وعلى جمهور الزمالك اللي حب وعشق ملك وحكمت الكرة بأحكامها بفراق مؤقت».
وأكمل: «صعبة وعلي شخصيا، فمن بعد اللحظة دي، مش هعلق وأقول: أنا ببقى عارف إنه هيقطم لجوه وانت بتبقى عارف إنه هيقطم لجوه وحارس المرمى بيبقى عارف والاستاد والجمهور في المدرجات والناس في البيوت وبيقطم لجوه وبيعملها كده وكل مرة بتدخل الشبكة أحلى من اللي قبلها) هفتقدك يا شيكا وربنا، الأسطورة سيترك الملعب ولكنه هيبقى في القلوب، كل التوفيق يا شيكا، كل المحبة، كل التقدير».
