تحدث أحمد حسام ميدو، عضو لجنة التخطيط في نادي الزمالك، عن ملف التجديد مع أحمد مصطفى زيزو نجم الفارس الأبيض، مع الفريق.
وقال ميدو في تصريحات تليفزيونية عبر شاشة «أون تايم سبورتس»: «بطالب جمهور نادي الزمالك، إنهم يدعموا ويساندو زيزو، لأنه كان ممكن في أكثر من موقف يمشي بفلوس أكتر بكتير ولكنه اختار يكمل في نادي الزمالك».
وأضاف: «زيزو دلوقتي في موقف قوة وده طبيعي لأنه دخل في آخر 6 شهور بعقده، ولكن أنا على تواصل دائم مع زيزو ووالده، ان شاء الله يتم التوصل إلى نقطة معينة ترضى كلا الطرفين للتجديد مع زيزو».
وأكمل: «زيزو لعيب مهم للفريق، ومخلص وبيقاتل في كل المباريات، ولكن هو الفترة الأخيرة واضح أنه متأثر جامد بموقف التجديد، وهو عليه دور كبير إنه ميسمعش لحاجة ويركز في شغله فقط».
وأردف: «كل الكلام إن زيزو هيوقع لـ نادي خليجي غير حقيقي، وأولويات زيزو والزمالك هو التجديد مع الأبيض، وكان من المتوقع والطبيعي إنه يجيله عروض من فرق عربية».
وزاد: «والد زيزو ليس عقبة في طريق الزمالك، بالعكس ده راجل بيدير أمور نجله بشكل سليم وهو اللي وصل زيزو للي هو فيه دلوقتي، وبيعمل على أنه يحصل على تقييم ابنه بشكل كويس».
وأتم: «اللي عنده مشكلة مع والد زيزو، بتكون عشان الراجل صريح وبيطلب مطالبه بشكل صريح، ودي مش مشكلة بالعكس دي حاجة إيجابية، وأنا بقول إن جمهور الزمالك لازم يساند اللاعب، بسبب عطاءه الكبير مع الفريق، ونرجعه لـ أفضل حالة ليه».
