انتقد الإعلامي أحمد شوبير حارس مرمى الأهلي ومنتخب مصر السابق ما حدث في مباراة الزمالك وبتروجت الأخيرة في الدوري والتي انتهت بالتعادل الإيجابي 1-1 بين الفريقين.
وعقب نهاية المباراة تم اختيار نجم الزمالك محمود بنتايك للفوز بجائزة أفضل لاعب في المباراة، قبل أن يتم التغيير ومنح الجائزة لصاحب هدف بتروجت اللاعب مصطفى الجمل.
وقال أحمد شوبير في تصريحات إذاعية: «قصة محمود بنتايك اللي حصلت في مباراة بتروجت والزمالك واختياره رجل المباراة ثم سحبها ومنحها لمصطفى الجمل، الحقيقة لا يصح وما ينفعش أعلن اختيار فلان الفلاني وبعدين أقول أنا غلطت واللي يستحقها فلان».
وتابع شوبير: «هقول لكم إزاي بيتم اختيار رجل المباراة، بيتم من خلال السادة اللي قاعدين في التليفزيون بيحللوا المباراة وده أمر خاطيء لإن المحلل اللي قاعد له ميول، عشان دي شغلتي وأنا عارفها فبقول لكم الحقيقة، فالأهلاوي بيروح للأهلاوي والزمالكاوي بيروح للزمالكاوي، هي ماشية بالشكل ده ومش مستندة على أسس أو أسانيد».
وأوضح شوبير: «فاللي حصل الكباتن الأفاضل الكبار اختاروا الأول محمود بنتايك وبعدها لما سجل مصطفى الجمل الهدف في الوقت الضائع اختاروا لاعب بتروجت، فغيروا وده خطأ كبير وده الغلط الأول».
وأضاف: «الغلط الثاني مينفعش أساسا هما اللي يختاروا، وأنا عندي اقتراح عشان دائما بقول القضية وبقدم الحل، وهو إن النجوم الكبار في اللجنة الفنية لاتحاد الكرة ممكن يقسموا نفسهم على المباريات ومعاهم كابتن علاء نبيل المدير الفني لاتحاد الكرة، لإن الأمر كده مش لطيف يا إما تلغي جائزة رجل المباراة لإن ما حدث عيب».
