نادرا ما سمعنا عن الدوري السريلانكي لكرة القدم، لذلك يتلقى المحترف المصري أحمد داهش، الكثير من الانتقادات والسخرية بسبب قلة شعبية الدوري الذي يلعب له.
وجاء الحوار كالتالي..
بدأت في ناشئين نادي النصر القاهري، ثم انتقلت إلى النجوم، وفي مرحلة الفريق الأول بدأت في سكر الحوامدية بالدرجة الثالثة.
وبعد موسمين انتقلت إلى بني عبيد بالدرجة الثانية، ولما خدت خطوة الاحتراف روحت الدوري المالديفي الدرجة الأولى ثم إلى سريلانكا، وبعدها روحت الدوري الليبي ورجعت تاني على سريلانكا حاليا.
جالي إصابة خلتني ابعد عن الكورة لمدة سنة ونص، وقبل كدا اشتغلت في الفلاحة عشان اساعد أهلي واقدر اكمل في الكورة.
الدوري السريلانكي معتمد على اللياقة البدنية والسرعات، لكن المصري أقوى طبعا من حيث كواليتي ومهارة اللاعبين والتكتيك.
أول شهر في الاحتراف فضلت تحت الاختبار، وكان الأكل والشرب على حسابي، ولما جت فلوسي تخلص ربنا كرمني بعد صبر وتعب ومضيت مع النادي.
متوسط الأجر للاعب كرة قدم في سيريلانكا ٢٠٠٠ دولار في الشهر.
مفيش حد عاش المعاناة اللي شوفتها في مصر، أنا فضلت 10 سنين بسافر من الشرقية للقاهرة، ومكنتش عارف أصرف على نفسي.
ودلوقتي لما حد بيتريق عادي بضحك وبقول لنفسي محدش عارف حاجة والكل باصص تحت رجلة، وفي وقت معين لازم تاخد قرار يغير حياتك للأحسن حتى لو كان الدوري ضعيف.
منصحش حد يجي سريلانكا إلا وهو معاه عرض رسمي من نادي، لأن الحياة في سريلانكا غالية جدا.
عندهم عادة صعب جدا، بيحطوا الشطة في كل الأكل بتاعهم، لكنهم شعب طيب مش عنصري، وفي مدن التماسيح بتمشي في الشارع عادي.
