كشف أحمد مرتضى منصور، عضو مجلس إدارة نادي الزمالك السابق، عن سر بيع إمام عاشور لاعب الزمالك السابق، ونجم الأهلي الحالي، مشيرًا إلى أنه تم بيعه بموافقة جميع الأشخاص بنادي الزمالك من لاعبين وعاملين.
وكان الزملاك قد وافق على رحيل إمام عاشور مدافع وسط الفريق للاحتراف بنادي ميتلاند الدنماركي في يناير 2023، مقابل ما يوازي 105 مليون جنيه فى صفقة بيع نهائي لمدة 4 مواسم ونصف، قبل أن ينتقل إلى صفوف الأهلي في يوليو 2023، مقابل 2 مليون يورو.
وقال أحمد مرتضى منصور في تصريح تليفزيوني عبر شاشة «هي»: «نادي الزمالك كان في احتياج للجنيه، والخزنة فيها 100 مليون جنيه حاجز عليهم ممدوح عباس رئيس الزمالك السابق، الناس بتقول بعتوا إمام عاشور ليه؟ بعناه عشان نسدد للناس فلوسها».
وأضاف: «أحمر الأحمر لاعب كرة اليد بنادي الزمالك، مكنش بينيمني كل شوية بيقولي فين فلوسي، شيكابالا نفس الشيء بيقول عايز فلوسي، واللعيبة والمدربين، دول ناس فاتحين بيوت».
وأكمل: «مفيش لعيب في نادي الزمالك، مكنش بيقولنا أبوس إيدك بيع أي حد وهاتلنا فلوس، إمام عاشور اللعيب الوحيد في تاريخ نادي الزمالك اللي اتباع بموافقة جميع اللاعبين والعاملين والإداريين ده نادي الزمالك».
وأردف: «أنا قولت ساعتها إني موافق حتى لو هينتقل لأي نادي آخر مباشرة، لأن 3 مليون دولار مكنش مبلغ صغير».
وأتم أحمد مرتضى منصور تصريحاته قائلًا: «اللعيبة قالتلي أبوس إيدك بيع أي حد عايزين ندفع قسط المدرسة، واللعيبة دي بتاخد ملايين».
