وجه محمد الدماطي، عضو مجلس إدارة النادي الأهلي، رسائل خاصة بشأن الضغوطات والانتقادات التي يتعرض لها من جماهير القلعة الحمراء.
وكتب محمد الدماطي، عبر صفحته على موقع التواصل الاجتماعي «فيس بوك»: «الحمد لله أنا عندي من الشجاعة والثقة اللي يخليني اقول كل اللي جوايا من غير كسوف بعيد عن أي حاجة، وبعترف بوضوح إني كبني آدم طبيعي أهلاوي متعصب وفي موقع مسئولية، بتأثر بشكل سلبي جدا من كمية النقد والضغط المتواصل، يمكن لمرحلة محدش يتخيلها عكس ما الناس بتبقي فاهمة».
وأضاف: «الاحساس ده بيزيد لأن حقيقي شايف الصعوبات والتحديات وفي نفس الوقت معنديش شك في أسلوب إدارة الكرة في النادي اللي مهما حصل بيقدر يجتاز أي صعوبات ويكمل، المهم أن كل الضغط النفسي ده اللي ببقي متخيل أنه حيفضل سايب جوايا رواسب مهما حصل بينتهي بمجرد ما بشوف الجمهور فرحان، مجرد كلمة واحدة كويسة بتمسح أي حاجة قبلها».
وتابع: «متفهم جدا أن الاهلي هو جنة جمهوره، الجنة اللي مش متخيل أنه يشوف فيها حاجة غلط ولو لفترة صغيرة، متفهم جدًا أن أي صعوبات في الدنيا الأهلي بيهونها وأنه مش مجرد نادي ده دواء لحاجات كتير أوي لينا كلنا».
