دار نقاش ساخن بين أحمد أسامة، المذيع في قناة النادي الأهلي، والإعلامي هاني حتحوت، بعد تعليق الأخير على بيان رابطة الأندية المحترفة بشأن تعديل عقوبة الأهلي بعد أزمة مباراة القمة مع الزمالك في الدوري الممتاز.
كان مجلس إدارة رابطة الأندية قرر مساء الأحد، عدم خصم 3 نقاط إضافية من الأهلي في ختام الموسم، والاكتفاء بتحميل النادي الغرامات المالية وفقًا للائحة، بالإضافة لاعتماد فوز الزمالك في المباراة بنتيجة 3-0.
في البداية، كتب هاني حتحوت تدوينه عبر حسابه على منصة «إكس» تعليقًا على القرار: «بيان ركيك مش عارف يجيب من اليمين ولا الشمال، أصدرت رابطة الأندية قرارا أقل ما يوصف به إنه وصمة عار في تاريخ الرياضة المصرية، أكاد أجزم إن لو سألت مشجع أهلاوي في الشارع هيتريق عليه، قرار تعلم رابطة الأندية إن محامي بعشرين فرانك يبطله، لكنها قررت تبقى أضحوكة وتضحّك علينا الخلق».
ليرد أحمد أسامة مقدمي البرامج في قناة الأهلي على حتحوت معلقًا: «أول مرة تتكلم عن الرابطة يا هاني من أول الأزمة عيد سعيد يا هاني».
وأجاب حتحوت على التعليق: «عشان عملت مصيبة أكبر من مصيبة انسحاب الأهلي من الماتش.. كل سنة وانت طيب».
قبل أن يعيد أسامة الرد من جديد: «اقرأ اللوائح يا هاني، و دي مش أول مصيبه تعملها الرابطة إذا افترضنا جدلاً دقة وصفك، بس انت لم تتحدث عن أي مصيبة سابقة يا هاني.. وانت طيب وبخير».
وقال حتحوت: «يا أسامة ما انا كالعادة بتكلم بعد ما بقرا اللوايح، مش بالتوجيهات وانت عارف».
وعقب أسامة مرة أخرى: «مقدر غضبك يا هاني جدا على فكرة، وهعتبر ذكرك لكلمة توجيهات نرفزة ملعب، والحقيقه أنا معرفش انت شغال إزاي زي ما انت بالظبط متعرفش أنا بشتغل إزاي، بس اللى انا أعرفه كويس إني لو كنت إعلامي في قناة عامة كنت هتناول أطراف الأزمة كلهم، مش من أول الأزمه مهتم اطلع طرف واحد فقط غلطان».
وكتب حتحوت: «خدت الكلام على نفسك ليه ده أنا برد على (اقرا اللوايح) بس».
ليختتم أسامة النقاش الساخن، معلقًا: «خالص والله يا هاني أنا معنديش مشكله حتى إنك تكون قاصدني بالكلام، الواثق في نفسه ميفرقش معاه كلام حد، وبعدين مش ده الأهم في القصه، الأهم ان الإعلامي الموضوعي في القنوات العامة يتناول أطراف الأزمة وإلا يبقى كده تعصبه تغلب على مهنيته».
