رد سيد عبدالحفيظ، مدير الكرة السابق بالنادي الأهلي، على تصريحات أحمد حسام ميدو، عضو لجنة التخطيط في نادي الزمالك، بشأن استعداد الزمالك لفتح «شيكات على بياض» للتعاقد مع لاعبي الأهلي.
وكان ميدو قد صرح في وقت سابق أن نادي الزمالك يملك «شيكات مفتوحة» لضم لاعبي الأهلي، في إشارة للرد على رغبة القلعة الحمراء في ضم لاعبي الزمالك، وأبرزهم أحمد سيد زيزو ومحمود «بنتايك».
قال عبدالحفيظ في تصريحات تلفزيونية: «لما نتكلم عن الانتقالات بين الأهلي والزمالك، فإحنا بنتكلم بالأرقام والتاريخ، وده مش بييجي صدفة، الأهلي من أكتر من 40 سنة، معظم اللي راحوا من عنده للزمالك، ماكنتش في رغبة من النادي لاستمرارهم، باستثناء عبدالله السعيد، ومعاه رمضان صبحي وأحمد فتحي».
وأضاف: «أما في الاتجاه المعاكس، فالوضع مختلف، من أول رضا عبدالعال وحتى بن شرقي، كلهم كان الزمالك متمسك بيهم، وكان عايزهم يستمروا، سواء معتز إينو، كهربا، إمام عاشور، أو حتى بن شرقي اللي الزمالك كان حابب إن يرجع ليهم تاني».
وتابع عبدالحفيظ: «الأهلي استفاد من الصفقات اللي ضمها من الزمالك على المستوى الفني والبدني، وده بيدل على حسن الاختيار».
واختتم قائلًا: «أما بخصوص الشيكات المفتوحة، فده كلام يتقال لكم أنتم مش لينا، اللي يعوزه البيت يحرم على الجامع، فخلي شيكاتك عندك وشوف احتياجاتك الأول، وكفي نفسك الأول».
