وجه محمود فايز مدرب منتخب مصر السابق روشتة، لمجلس إدارة الزمالك وبقية الأندية الشعبية، في حال رغبتها في المنافسة مع النادي الأهلي بعد الأنباء المنتشرة عن توقيع أحمد سيد زيزو.
وكتب محمود فايز عبر صفحته الشخصية على «فيس بوك»: «رسالة بسيطة لنادي الزمالك وجمهوره العظيم وبالمرة بقية الأندية الشعبية لو عايز تحافظ ولو على جزء من المنافسة، لأن المسافات بقت شاسعة مع النادي الاهلي والمنافسة المادية والاستقرار والبطولات بعدت جدًا جدًا جدًا».
وتابع: «ده يا راجل أول فيزا طلعت لزيزو مع النادي الأهلي كانت أمريكا وكأس العالم للأندية وحضرتك معرفتش تطلع فيزا لأحد أهم محترفيك لبلد أفريقية».
وأضاف:«بسم الله الرحمن الرحيم، معندكش رفاهية الخطأ والتجريب في المحترفين بتوعك، لازم من امبارح تكون بتدور وبتستكشف لاعبين في كل دوريات العالم وتختار الأنسب، يعني تحط دولارك في اللي يستاهل، متنتظرش وكيل جايب لك لاعب في إيده، مجموعة شباب دارسين يلفوا العالم وانت قاعد في مكانك بحاجه كده اسمها scout search engine».
وأكمل: «قطاع ناشئينك هو الحل، برضوا من امبارح التعاقد مع مدرسه أوروبية أو لاتينية وشراكة لتطوير قطاع الناشئين، أي حد من نجومك يطلع على أوروبا يبحث عن شراكة وسهلة تتعمل وبتلاتة تعريفه وممكن ببلاش كمان بشوية شروط، كام مطور ومحاضر ومدرب لياقة علشان يطوروا مدربينك وتحط سيستم قابل للتنفيذ، وتتابعه وتصرف عليه وتستثمر فيه».
واستكمل: «وتطوير البنية التحتية لناديك، من ملاعب وصالات جيم… وسبا وأماكن استشفاء، إلخ، منظر ملعب تدريب الزمالك محزن للأسف، وأهم حاجة الصيانة الدورية (أفة أي حاجه في مصر)».
واختتم: «أنا آسف لو كلامي هيضايق حد من المسؤولين، بس هي وجهة نظر فنية بحته تحتمل الخطأ والصواب، بس الفكرة تدور حول ذلك، مش هتخترعوا العجلة من اول وجديد، ووالله لا هو تنظير ولا فزلكة، والسلام عليكم ورحمة الله».
