انتقد أحمد شوبير حارس مرمى الأهلي ومنتخب مصر السابق، نجم الفريق الكروي الأول بنادي الزمالك ناصر ماهر بعد ما بدر منه خلال مباراة الفريق أمام حرس الحدود أمس في الدوري والتي انتهت بفوز الزمالك 2-0.
وقال أحمد شوبير: «أنا من الناس اللي مقتنعين جدا بناصر ماهر ومهاراته وإمكانياته، معنديش عليه أي تحفظ كرويًا، لكن خلال مباراة الزمالك وحرس الحدود رفض يقعد احتياطي وقال مش هقعد احتياطي فعلى طول بيسيرو استبعده ومدير الكرة عبدالواحد السيد قدّم توصية لمجلس الإدارة بخصم 25 في المائة من مستحقاته وبقت فيه مشكلة».
وأوضح شوبير: «انتوا عارفين إن ناصر عنده مشكلة من فترة كان عنده إصابة طويلة ورجع بعد غياب في مباراة الاسماعيلي واطرد وقتها بشكل ليس له مبرر، ورجع بعد الطرد برضه تحس إنه مش مركز، وكان فيه كلام عن تعديل عقده وكتب هو كلمتين وأنا قولتهم هنا وقولت خلاص أنا كده مصدق ناصر طالما هو اللي قال».
وأضاف شوبير: «لكن إمبارح يرفض يقعد احتياطي لأ، أنت بتلعب في نادي الزمالك خلي بالك اسم النادي اللي أنت بتلعب فيه وكان رد الفعل قوي من الإدارة وده رد فعل محترم جدا».
ووجه شوبير رسالة للاعب مختتما: «يا ناصر لازم تعيد حساباتك مع نفسك، والمشاكل دي هتأثر عليك أكثر ما هتأثر على الفريق».
