أثار شريف إكرامي، حارس مرمى الفريق الكروي الأول بنادي بيراميدز، الجدل، برسالة غامضة عبر حسابه الرسمي على موقع التواصل الاجتماعي «إكس».
ونشر إكرامي عبر حساب على «إكس» (تويتر سابقا): «نفس القرار ممكن يتقال عليه خيانة من لاعب واحتراف من لاعب تاني مش علشان التصرف مختلف، لكن علشان القميص اختلف، الأحكام بقت حسب المزاج والمصلحة، مش المبدأ».
وأضاف: «تسمع نفس الأشخاص بيقولوا عكس أحكامهم القديمة والتبرير بقى فن بيتفصّل على مقاس الانتماء مش على مقاس الحقيقة. الإدارات بتوجه، والإعلام بيغذي العاطفة، والجمهور في النُص ضحية الجميع».
وتابع: «الاحتراف مش كلمة تتقال حسب المصلحة ولا تتشال وقت الغضب، ده الواقع وأساس اللعبة. زي ما النادي حر، اللاعب كمان حر، قراره صح أو غلط مش مهم لان مش ده الموضوع، الأهم أن الاختلاف في القرار لا عمره كان خيانة ولا قلة أصل ولا ليه علاقة بضعف أو قوة الانتماء».
وأتم: «الموضوع مش قرارات اللاعبين أو الأندية. اللي محتاج يتغير هو النظرة، طريقة التفكير، والأحكام على القرارات نفسها».
ويأتي ذلك بعد تصريحات الإعلامي أحمد شوبير، عن أنباء انتقال محمد شريف، لاعب الخليج السعودي والأهلي السابق، إلى نادي الزمالك خلال نافذة الانتقالات الصيفية المقبلة.
وقال شوبير في تصريحات خلال برنامجه الإذاعي «مع شوبير» على إذاعة «ONsport FM»: «في ناس بعتتلي رسايل بتقولي يا كابتن قول لمحمد شريف ميروحش الزمالك!؟، وأنا بأقولهم ليه ميروحش الزمالك هو في حد في الأهلي كلمه والزمالك فريق كبير وشريف مؤكد هيتألق معاه».
وأضاف: «شريف منتظر قرار الأهلي حتى الآن، بس لو اختار الزمالك هيبقي حقه. وفكرة لما قال معايا الجنيه في الأهلي بعشرين برة كانت في زمن غير الزمن».
وتابع: «مش فاهم ليه الناس زعلانة من أن شريف يروح الزمالك، زي ما أنا مستغرب أن في ناس حزينة من أن زيزو هيلعب في الأهلي. الموضوع مهم جدا وهو وضع قائم. وما دام التعاقدات برضا الأندية بينها وبين بعضها أو بعد انتهاء تعاقدات اللعيبة مع أنديتها. ولعيب الكورة عمره مش طويل في شغله ومن حقه يستغل كل فرصة».
