شن مجدي عبدالغني، نجم الكرة المصرية السابق، هجومًا لاذعًا على مجلس إدارة الأهلي برئاسة محمود الخطيب، بسبب أزمة عقد السويسري مارسيل كولر، المدير الفني السابق للفريق الأول لكرة القدم بالقلعة الحمراء.
وقال مجدي عبدالغني، في تصريحات تلفزيونية عبر فضائية «الشمس»: «احنا مش عارفين كولر، بياخد كام، ومرة يقولوا الشرط الجزائي بتاعه شهرين ومرة يقوله 14 شهر، طيب كولر، هياخد شرط جزائي سنة عشان الأهلي هيفسخ عقده؟ لأ خليه تديله 14 شهر ليه؟ لأنك هتروح تجيب مدرب تاني وهياخد راتب كبير وهيحط شرط جزائي وممكن يمشي».
وأضاف: «إيه اللي احنا فيه ده! أنا مش عارف ومش قادر أفهم، دي نقطة مش قادر أفهمها، واللي وصلنا إن كولر، بياخد 250 ألف دولار في الشهر».
وتابع: «كل الناس بتقول كولر، بياخد 250 ألف دولار، ومفيش مسؤول رسمي في الأهلي عايز يقول بياخد كام، زي ما يكون سر حربي، دي كورة لازم يبقى فيها شفافية، إنت مفروض تعلن عقد المدرب كام، معنى انك متتكلمش يبقى اللي مكتوب صح».
وواصل: «إيه اللي احنا فيه ده مفروض تطلع تقول قيمة الصفقة كام عشان نبقى فاهمين واحنا بنتكلم منقولش أي كلام».
وتسائل: «انتوا إزاي مضيتوا على عقد كولر؟ كولر عايز 3 مليون دولار، إيه ده! الأهلي هياخد 10 مليون دولار من خلال مشاركته في كأس العالم للأندية هيطير منهم 3 مليون دولار و200 مليون مصري أنا مش فاهم ايه اللي بيحصل!».
وأتم: «أنا عايز حد يفهمني ياريت الأهلي يعمل مؤتمر صحفي يوضحلنا فيه الدنيا ماشية إزاي، مفروض يطلع محمود الخطيب، يقولنا إيه اللي بيحصل».
