كشف الإعلامي أحمد شوبير حارس مرمى الأهلي ومنتخب مصر السابق عن كواليس الأزمة الدائرة حاليا بشأن موعد مباراة نهائي كاس مصر بين الزمالك وبيراميدز.
وقال أحمد شوبير في تصريحات إذاعية اليوم الثلاثاء: «أنا كنت قلت لكم رغبة بيراميدز وترحيب الزمالك بتأجيل نهائي كأس مصر، ورأيي إنك تأجل مباراة بيراميدز مع بتروجت يوم 17 في الدوري المصري حركه خليه يوم 15 أو بعد النهائي لإن فيه ماتش الزمالك وبيراميدز كمان في الدوري يوم 13 مايو».
وتابع شوبير: «لكن مع الكلام اللي جاي إن فيه عرض من الإمارات لاستقبال نهائي كأس مصر، بدأت الخطة تتغير داخل اتحاد الكرة، ويقول لك نخليها يوم 5 أو 6 يوليو، بس ده هيوافق ممكن وقفة عرفات أو أول أيام عيد الأضحي، فيبقى يوم 5 أفضل من 6 بدل ما تيجي تقول ده العيد جه فخلينا يوم 10 وبعدها تقول عيد تاني جه خلينا يوم 18، وهكذا فخليك حاسم في هذه القرارات خاصة إنك قولت إن القيد هيفتح يوم 2 يونيو، فكده ممكن تأجل القيد وتعمل قيد استثنائي للأهلي عشان كأس العالم للأندية».
وأوضح شوبير: «كمان عندك تعارض مع معسكر منتخب مصر فلو خدت لاعيبة بيراميدز ولاعيبة الزمالك مش موجودة وكمان لاعبي الأهلي مش موجودين فكده حسام حسن هيعمل معسكر ليه، وهو كده كده مقرر مش هيعمل معسكر إلا بوجود اللاعبين الأساسيين، فاتحاد الكرة يقول فرصة وألغي المعسكر عشان أعمل نهائي كأس مصر، طيب هتقول لي ما كده محلولة يا كابتن لا مش محلولة وهقول لك ليه».
وأضاف شوبير: «فيه حاجتين هل عرض الإمارات نهائي ومؤكد وموقف ثلاثي الزمالك مصطفى شلبي ودونجا وعبدالواحد السيد، هيكون أيه، هما واخدين عفو رئاسي من رئيس الإمارات بس هل دخولهم هيكون عادي ولا فيه مشاكل لازم يكون فيه حل لهذا الأمر، وام علمته أنه هناك اتصالات تتم خلال الساعات الأخيرة بخصوص ذلك».
وتابع حارس الأهلي السابق: «الشيء التاني المهم هناك لاعبين أجانب في الزمالك وبيراميدز، وفي الموعد المقترح لنهائي الكأس هيكون فيه أجندة دولية فممكن يكون محمد الشيبي في المنتخب المغربي وبلاتي توريه مع بوركينا فاسو، وفيه سيف الجزيري مع تونس، فهل الناديين هيوافقوا ولا لأ».
واختتم شوبير: «أمنيتي اتحاد الكرة ياخد قرار واضح وصريح في هذا الأمر عشان الأمور تبقى واضحة ونقدر نشتغل بشكل صحيح».
