وجه الإعلامي أحمد شوبير حارس مرمى الأهلي ومنتخب مصر السابق انتقادات لاذعة إلى مهاجمي أيمن الرمادي المدير الفني الجديد للفريق الكروي الأول بنادي الزمالك في الساعات الماضية بدعوى أنه ليس من أبناء نادي الزمالك.
وقال أحمد شوبير: «خليني بس أكلم في شوية تابوهات انتقاد أيمن الرمادي إنه مش من أبناء نادي الزمالك ليه، هو بيسيرو كان من أبناء الزمالك ولا كابرال ولا فينجادا ولا جوميز من أبناء الزمالك، هيقول لك أصل ده مدرب أجنبي طيب هو كابتن محمود الجوهري كان من أبناء الزمالك».
وتابع شوبير: «طيب عملتوا أيه مع أبناء الزمالك حسن شحاتة لما تولى المسؤولية، ولا فاروق جعفر ولا حلمي طولان ولا طارق يحيى هل قمت بمساندتهم يا أبناء نادي الزمالك، خلاص فيه مدرب جه كلكم تساندوه لو أنتم بجد بتحبوا الزمالك وعايزين تساندوه».
وأوضح شوبير: «أنا كنت كابتن الأهلي وكابتن الجوهري تولى تدريب نادي الزمالك روحت له التدريب واستقبلت استقبال حافل أيه قصة أبناء نادي الزمالك دي مش فاهم».
وأضاف شوبير: «هو مين الجهاز المعاون مع أيمن الرمادي ما كلهم من أبناء نادي الزمالك، حازم إمام وأحمد سمير وغيرهم، هو أنت عايز الزمالك ينجح ولا مجرد إن حضرتك مش موجود في الجهاز فزعلان، أنا طبعا بكلم على أسماء من جيلنا أو أقل شوية».
واختتم شوبير: «خلي الناس تشتغل ما جه جروس ومنجحش وجه بيسيرو ومنجحش، لكن فيريرا لما جه كسّر الدنيا مع نادي الزمالك هل حافظتم عليه، الجرهري ما اتحافظش عليه، كابتن أبورجيله أعظم من حقق إنجازات لنادي الزمالك فيه حد بيسأل عليه من أبناء الزمالك أنا بكلم معاه يوميا، خلاص هو الرمادي تولى المسؤولية يبقى نسانده».
