شن الإعلامي أحمد شوبير حارس مرمى الأهلي ومنتخب مصر السابق هجوما عنيفا على محمد شيحة نائب رئيس الإسماعيلي السابق بسبب البيان الذي أصدره أمس وهاجم فيه مجلس إدارة الدراويش الحالي برئاسة المهندس نصر أبوالحسن.
وقال أحمد شوبير في تصريحات إذاعية اليوم الإثنين: «أنا أول واحد متعاطف مع النادي الإسماعيلي لكن فيه ناس عايزة تستغل الوضع الصعب اللي فيه النادي لتحقيق مكاسب شخصية».
وأوضح شوبير: «صديقي العزيز محمد شيحة كاتب بيان رقم واحد الصادر عن جبهة الإنقاذ انتقد فيه الأحوال داخل النادي على كافة الأصعدة وطالب بتقديم مجلس الإدارة استقالته عقب المباراة الأخيرة للفريق في الدوري، أمام غزل المحلة وفي حال عدم الاستقالة يتم عمل جمعية عمومية طارئة لسحب الثقة».
وعلق شوبير مستنكرا: «ده بجد الكلام ده الإسماعيلي بيهبط وأنت بتقول الكلام ده، ما حضرتك كنت موجود من كام شهر عملت أيه، هو فيه أيه يا أخي الضرب في الميت حرام، ما خلاص كده كده مفيش ثقة هو لسه فيه ثقة في مجلس الإدارة الحالي عشان تقول تنسحب، وبتقول النادي مكبل الديون ما حضرتك كنت ماسك ما حليتش ليه أزمة الديون أنت بتسخن النادي والرأي العام في الإسماعيلي على مجلس الإدارة وخلاص».
وأضاف شوبير: «تعالى أنت أمسك المجلس، اللي عنده كلمة طيبة يقولها دلوقتي اللي عنده فرصة للحل يقدمها هو كله عمال يضرب بس، محدش بيدي حلول كل دول كانوا في موقع المسؤولية».
واختتم شوبير: «أنا مش بشوف حد غيور على الإسماعيلي زي الدكتور عبدالمنعم عمارة والكابتن على أبوجريشة واللاعبين القدامى زي كابتن سيد عبدالرازق، يا جماعة الكلام ده مينفعش فيه حاجة غريبة ومش طبيعية بتحصل».
