علق أحمد دياب رئيس رابطة الأندية المصري، على تصريحات طه عزت رئيس لجنة المسابقات، بأنه نفذ لائحة الانسحاب في أزمة مباراة القمة لكن الرابطة هي من ألغت القرار وخففت العقوبة على الأهلي.
وقال دياب في تصريحات عبر قناة «أون سبورت»: «اللوائح اتعملت، جديدة تمامًا، سواء لائحة مسابقات الدوري أو كأس العاصمة أو العقوبات، وكان فيه مطلب جماعي إن يكون في لوائح جديدة».
وأضاف: «الكلام اللي أثير واتقال على السوشيال ميديا مالوش علاقة بحقيقة اللائحة، وفي مواد اتقال إنها مينفعش تبقى موجودة في اللائحة الجديدة، وده كلام مش صحيح لأن المواد دي موجودة في جميع دوريات العالم، زي المادة 62 و63 بتقول إن دي لائحة جديدة، وأي تعارض بينها وبين أي قرارات قديمة، اللي يمشي هو بنود اللائحة الجديدة بس».
وأوضح: «لجنة المسابقات لما بتصدر قرار على حسب اللائحة، من حق مجلس إدارة الرابطة يعدّله ويخفضه، زي ما هو من حق الاتحاد الإفريقي وفي العالم كله لما بيصدروا عقوبة على نادي وبعد كده بيتخفض القرار عادي وده موجود في اللوائح».
ورفض التعليق عن حيثيات قرار أزمة القمة، قائلا: «مش هتكلم في تفاصيل أزمة القمة، علشان فيه خطوة قضائية جديدة من الأطراف في الأزمة. إحنا بنتعاون مع كل الأندية، وبنمثلهم، وعلى مسافة واحدة من الكل، فأي قرار بيخص طرفين مش ممكن يرضي الاتنين».
وأضاف: «أي نادي لو القرار جاي في صالحه هيشيد بيه، ولو مش في صالحه هيهاجمه، وده طبيعي. ممكن أه مداخلة طه عزت مكانتش موفقة، لكن أوقات الضغط بيكون كبير جدًا ويأثر ولكن بنلتمس له العذر، طه كادر كويس وبيعمل شغله، وممكن نعذره علشان الضغط ساعات بيخلي الواحد يغلط وكل الأندية أشادت بمجهوده».
وأتم: «لما عرضنا اللائحة النهاردة، كل الأندية أشادت بيها فمفيش داعي للكلام اللي بيقول إن اللائحة مش مفهومة، أو الأندية وافقت عليها إزاي».
