وجه عبدالله مصطفى، لاعب فريق نادي الزمالك لكرة القدم للساق الواحدة، نداءً إلى رئيس الجمهورية، بعد قرار تخلي إدارة النادي عنهم.
وكتب عبدالله مصطفى عبر حسابه على «فيسبوك»: «نداء إلى السيد الرئيس عبدالفتاح السيسي – رئيس جمهورية مصر العربية».
وأضاف: «أنا عبدالله مصطفى، كابتن فريق نادي الزمالك لكرة القدم للساق الواحدة، بقالي سنتين أنا وزملائي بنلعب ونمثل نادي الزمالك بإخلاص، من غير أي مقابل، وبنحاول نرفع اسم النادي ونوصل رسالة: إن الإصرار والعزيمة أقوى من أي تحدي… وإن فقدان جزء من الجسد عمره ما بيكون نهاية».
وأكمل: «لكن للأسف، بعد كل ده، إدارة النادي قررت تتخلى عننا وتمشينا، بدون أي تقدير أو حتى كلمة شكر، وفي أصعب وقت… لأننا دلوقتي بنستعد نمثل مصر في كأس العالم لكرة القدم للساق الواحدة السنة الجاية».
وتابع: «القرار ده كسرنا، مش علشان الفلوس، لكن علشان الإهمال والتجاهل اللي بنتعامل بيه، كأننا مش موجودين… كأننا ما تعبناش، وما رفعناش اسم الزمالك، وما اجتهدناش علشان نكون على مستوى تمثيل بلدنا».
وزاد: «أنا بناشد سيادتك يا ريس، وأنت دايمًا الراعي والداعم لأصحاب الإرادة القوية… إحنا شباب بنحب بلدنا، وعندنا طموح، وكل اللي محتاجينه دعم وتقدير علشان نقدر نكمّل المشوار ونرفع علم مصر قدّام العالم. ادعمونا… ما تسيبوناش نضيع بعد ما قربنا نوصل».
