هاجم الإعلامي أحمد شوبير حارس مرمى الأهلي ومنتخب مصر السابق، المهندس هاني أبوريدة رئيس اتحاد الكرة، بسبب تدخلات الثنائي المهندس أحمد مجاهد وحازم الهواري في إدارة العديد من الملفات في اتحاد الكرة.
وأوضح أحمد شوبير أن المسؤول عن ملف الهبوط وإلغائه هذا الموسم كانا أحمد مجاهد وحازم الهواري.
وقال شوبير: «نداء للمهندس هاني أبوريدة، ولا بلاش أبوريدة عشان هو لا يدير هذه الحتة بوضوح شديد المهندس أحمد مجاهد وحازم الهواري عشان كل واحد منهم واخد حتة في اتحاد الكرة، وبيكلموا الناس يقولوا لهم أنا هعينك هنا وأنا هجيبك أيه، بس إحنا لسه بس لم نشكل المناطق، اللي بقوله لك ده بجد مش هزار والله، طيب أقول لمين يعني أقول لوزير الرياضة محبش الوزارة تتدخل في المسائل دي».
وأضاف شوبير: «بقول للمهندس هاني أبوريدة إن ما يحدث خطأ فادح، وهترجع بكرة القدم المصرية سنيين للخلف، لا تسلم هذه الأمور لأي شخص، كفاية بقه بجد ما يجيش أبوريدة يقول لي بعدها تعتب على أيه أنا في أديه أيه، لأ أنت في أيدك كل حاجة وأوعى تنزل لي بسلام فات الميعاد، ومش هقعد أغني لك كل ليلة وكل يوم أسهر لبكره في انتظارك، انتظار أيه ما أنت موجود أصلا، وأفضل أغني له موعود معايا بالعذاب موعود يا دوري إحنا عندنا دوري ناجح كملوا عليه عشان يبقى فيه فرصة إن الكرة المصرية تبقى جيدة».
