هاجم مروان حمدي، لاعب بيراميدز، الإعلام ومن شجع خصمهم فريق صن داونز، بعد التتويج بلقب دوري أبطال أفريقيا 2025.
وفاز بيراميدز بدوري أبطال أفريقيا، للمرة الأولى في تاريخه، على حساب صن داونز، بعد الانتصار عليه، بنتيجة (3-2) بمجموع مباراتي الذهاب والإياب.
وكتب مروان حمدي عبر حسابه على «إنستجرام»: «الحمد لله، احنا أبطال أفريقيا بعد تعب كبير جدًا وموسم عظيم لينا. ربنا كرمنا بأغلى وأهم بطولة،كسبناها عن استحقاق وبمجهودنا وتركيزنا وإصرارنا».
وأضاف: «فخور جدًا بينا وبأخواتي أحسن لاعيبة في مصر وأفريقيا، وأنضف شخصيات. كل فرد داخل منظومة بيراميدز يستحق الشكر، وشكرًا جدًا للجمهور المحترم اللي جاه ساندنا النهاردة. حقيقي كانوا ناس جميلة جدًا».
وأكمل: «مفيش نادي في العالم بيتولد بجماهير، لكن الشعبية بتتعمل واحدة واحدة، والناس هتبدأ تشجع بيراميدز، وأنا واثق في ده إن شاء الله.
وتابع: «وقتنا دلوقتي نستمتع، وعايز أقول معلش لأي حد كان عايز يشمت فينا أو كان بيتمنى نخسر. معلش جدًا، صعبان عليا والله. ألف شكر لإعلامنا الجميل المحايد العسل النموذج على النزاهة والأمانة في الشغل، وعلى اهتمامه ببيراميدز الفترة اللي فاتت، وأنه فريق مصري وصل نهائي أفريقيا وتغطية جميع أخباره ومتابعته».
وزاد: «والمناسبة، احنا مكناش محتاجين دعمكم في حاجة، بس أنتم فعلًا واضحين جدًا للجميع، إلا من رحم ربّي. لكن ده العادي من إعلامنا المعروف عنه أنه بيشتغل الشغلانة صح بمعايير الإعلام المضبوطة، مش بيخاف من حد ولا شغال مصالح شخصية وماشي مع القطيع. الحمد لله. وأخيرًا هارد لك لمشجعين صن داونز الناطقين باللهجة المصرية».
