فتح الإعلامي أحمد موسى، النار، على الاتحاد المصري لكرة القدم بسبب مباراة الزمالك وبيراميدز غدا في نهائي كأس مصر.
ومن المقرر أن يلتقي الزمالك مع بيراميدز في تمام الساعة الثامنة والنصف مساء غدا الخميس على استاد القاهرة الدولي.
وقال موسى في تصريحات خلال برنامجه المذاع عبر قناة «صدى البلد»: «بمناسبة وقفه عرفات، بكرة عندنا مباراة نهائي كأس مصر بين نادي الزمالك المحترم ونادي بيراميدز المحترم وانا مش عارف ليه الساعه 8:30».
وأضاف: «أتمنى بكره المباراة متبقاش الساعه 8:30.. فيها ايه لما تبقى 10 الناس صايمة والإفطار الساعة 8 والجو حر موت».
وتابع: «انتوا عايزين تتعبوا الناس ليه!! ما تخلوا الماتش الساعة 10 ايه هيجرا في الدنيا يعني.. هو في حاجة بكرة يعني مهمة الساعة 10».
وأردف: «في حاجة يعني مخلياكم مستعجلين.. اللي هو يا دوبك افطروا والعبوا ليه يعني.. ليه إجهاد اللعيبة والجمهور، ما تخلوها عشرة براحتكم والناس تسهر براحتها دي ليلة العيد والناس تفرح وتتبسط والفائز هنقوله مبروك».
وطالب موسى: «أتمنى تعديل المباراة، ليه نتعب الناس وتعالوا صايمين وأفطر في الملعب ونص ساعة وتلعب ليه كل ده ورانا ايه يعني.. ما الناس تفطر براحتها وتروح الاستاد».
وأتم: «أرجوكم خلوا اليوم حلو والناس تفرح وتتبسط وادوا فرصة الناس تفطر وأدوا فرصة الناس تتابع الماتش براحتها مش كله ورا بعض كده، لو سمحتوا لو سمحتوا لو سمحتوا عدلوا توقيت المباراة بكرة وكل سنة وأنتم طيبين وشعب مصر العظيم بخير دايما».
