حذر أحمد شوبير حارس مرمى الأهلي ومنتخب مصر السابق من كارثة تهدد بطولة الدوري المصري في الموسم الحالي في ظل استمرار الأخطاء الكارثية من الحكام بالصورة التي عليها الآن منذ بداية الموسم.
وقال أحمد شوبير في تصريحات إذاعية اليوم الإثنين: «هقول لكم حاجة المفروض ماسيمو بوساكا كان يعمل محاضرة أول إمبارح فقال لك نستعين بالمحاضرين المصريين، وجابوا الحالات اللي فيها شك فالمحاضرين المصريين قالوا لا نتفق مع قرارات الحكام في 4 حالات فالحكام فرحوا وقالوا إحنا صح».
وتابع شوبير: «بعد كده عملوا نفس المحاضرة مع بوساكا وعرضوا نفس الحالات، فقال بوساكا كل الحالات غلط قرارات الحكام فيها، وبوساكا قال لهم هو انتوا معندوكوش كروت حمراء لقى كل الكروت الحمراء بتطلع بعد الفار».
وأوضح شوبير: «المشكلة عندنا إن الحكام بقوا بيخافوا وقراراتهم مرتعشة وده نابع من المنظومة الكروية اللي كلها غلط، لا في قرارت رادعة ولا فيه حماية ولا فيه جراءة، مفيش مساندة قوية لحكم على دراية وصح».
وأردف حارس الأهلي السابق: «القصة دلوقتي بقت قرايب قرايب نسايب نسايب، وأنا أكثر واحد مش ممكن اكلم على أبناء الحكام عشان ابني بيلعب كورة لكن فعلا فيه حاجات بتحصل في المنظومة التحيكيمة في مصر بمثابة الكارثة وما يحدث من اتحاد الكرة أنت لما جيت قولت اسبوع اسبوعين وخبير أجنبي وبعدين جبت حد امبارح فالراجل يترمي أخبار إن عليه قضايا ومش عارف أيه».
وأضاف شوبير محذرا هاني أبوريدة رئيس اتحاد الكرة: «هتكلمها بالشكل ده يا باشمهندس هاني، يبقى هنقرأ الفاتحة على بطولة الدوري قريب جدا، اه والله مش بهزر، هنقرأ الفاتحة على المنظومة كلها لإن الأمر خلاص انتهى والـ18 نادي اللي في الدوري المصري خلاص الأمر انتهى بالنسبة لهم لإن الشخصيات اللي موجودة مستحيل تدير منظومة تحكيمية في أهم دوري في المنطقة العربية».
واختتم شوبير: «الحقوا نفسكم قبل ما يفوت الأوان لإن الأمور صعبة جدا تحكيميا ولو هنفضل كده هيكون الدوري كل سنة وانت طيب».
